CHIKE LUO

Yawuoyi gi Nyiri; Jandiko, Wuon Abila

Nyombo; Jandiko, Wuon Abila

Pacho; Jandiko, Wuon Abila

Yiko; Jandiko, Wuon Abila

   
   
   
   

Chike Ma Nyaka Joluo Riti

Dinde jorachere, jorabuore gi joka Nyikwaya moko mawuok yo Ugwe nochonwa ethuolo mane oyudo kwerewa osesingore gi Nyasach Kwere (Rabudi, Podho, Ramogi gi ma moko...). Mano omiyo okwanyal wuondore kendo umore e din welo (Jo-Kristo gi Islam) gi wiwa ka gima wakia gima watimo nikech lony gi rieko mane gikelonwa.

Ayie ni sikund rieko, osiptende, masinde to ber gi lony manyien bende ber to kata kamano gimiyo wabagni kendo wabayo yo. Gigo duto miyo wiwa wil gi yore mane wapako kendo dendogo Nyasach Kwere, Nyasach Rabudi Kwarwa.

Kik ng’ato par ni adagi ni Abraham ok en kwarwa kuom Yie; Ooyo ayie kendo asiro wachno ahinya, pogruok biro bang’ dak Onam (Noah) e gwenge masani okiewo gi Turkey, Iran, Iraq gi Armenia mago pinje ma yudore Asia madiere.

Anyuola ka anyuola nigi kit Yie margi, wan joluo kik wawe kit Yiewa kaka nowenwa gi Kwere. Yesu wuod Maria nowachoni miuru Kaisar pokne to Ruoth Nyasaye bende umi mare. Mag pinyini itieko gi chike kwere. Polo to jogo moyie biro dhiye kadipo ni entie adier.

Kaka kamano Yieni gi timni e pinka ema noluwi. Berni ema norieny, Kiti ema biro Kwoyi kuom masira mar mach mochwere kadipo ni entie adier. Jokiyaka mane obiro e pinywa kaka; Onjiro Nyamande, Jo-Ingresa, Jo-Frans, Jo-Itali nedwaro mondo wasom dhok mondo obed kaka olalo ma wanyalo kalo godo aora (wuoyo gi mwache ma moko man e tunge pinje). Mano wach ma ber aduwa to wiwa kik wil gi kitwa gi timbewa, Nyikwa Ramogi.

Dindegi to ne gikelo mondo othir Yiewa. Kendo mondo obed Okumba mane gi nyalo sirogo loch gi mako piny endalo mane pod gidak kodwa. Ethuloni nyaka koro walok pachwa kod Yiewa, Penjo ma ji penjore nito walok pachwa nang’o? Dwoko yot; Luwo Chike Kwere kata sani e piny Kenya oganda temo loko Chike Piny Owacho mane jo-Ingresa owenwa.

Ngech Luo moro wacho ni NG’ECH NENO GI WANG’E, ka idagi luwo chike Luo ma abiro temo puonjo e Mbuyi mar Joluo dot Kom, to rit INE GI WANG’I! Yie isom kodwa kaka abiro temo ndikonu Chike Luo kendo dwoko penjo ma ng’ato ka ng’ato nyalo bedogo.

Orwaku duto e Mbuyi manyienni kendo konywauru gi paro kaka wanyalo gere.

 

Wuon Abila,

Joluo dot Kom