ragenya

Od Wadu
     
 

 

RAGENYA

Onyuolo yawuoyi adek; Anam Lwanda, Nyamuot gi Puny. Ka koro watemo ng’iyo e piny masani jodak ei Ragenya koro nyalo romo dhoudi aboro, moko mwache to moko bende joluo omiyo gi kikore. Luo gitiendgi man ei Ragenya gin joka-Mudama ma ji thoro luongo ni jo-padhola. Kane Dimo odonjo ei Kenya, Omollo nodonjo dala Puny to Dimo nodonjo dala Alego.

 Anam Lwanda

Onyuolo yawuoyi ang’wen; Boro, Ger, Ragak gi Ralek.

Bang’ tho Anam Lwanda to noweyo ka wuode maduong’ miluongoni Boro osegoyo dalane, omiyo yawuote duto nodong’ e dala Boro kaka owadgi maduong’ ma koro odong’ e lo wuon. Ka noyudo gidak kanyakla gimoro notimore machal mana gi mane otimore Lira chande. Nyathi Boro nomuonyo tik Ger, kendo Ger nochuno Boro mobaro nyathine ma gigolo tigo, nyathino notho. Mano nokelo sigu maduong’ ahinya ekind yawuot Anam Lwanda.

Ragak gi Ralek noringo oweyo dalano kaluwore gi gombo mane osetimore e kind Ger kod Boro. Kane gisedar Ragak nodhi e dala Miyawa kendo noloke kaka misumba (omwasi). Ralek to nodhi milambo gi chiege achiel miluongo ni Nyada mano ema oloso gweng’ masani iluongoni Kanyada.

 Ragak to nosiko e dala Miyawa nobedo kaka jadang’ wiye dhok, aming’a piny Ragak nonyoumo nyar Alego miluongoni Ato. Koro Miyawa nobedo kaka ore,  kane ochopo chieng’ moro achiel, Miyawa noyang’o dhiang’ kane omiyo Ragak wich mondo odang’ to nodagi, kendo nokwero Miyawa niya,  Ooyo, an tinde an or omiyo ok anyal dang’o wiye dhok” To Miyawa nopenje niya, “ma yande idang’o wiye dhok chande dak ne itamri, kane ing’eyoni ibiro nyombo? masani to koro iwachoni in or…” Noduoke kendo niya, “wiyego bende yande ok adang’ nene agoyo mana dero ema akanoe wiyego duto”.

 Kane omuk dero to noyud ka wiye opong’o. Mano nomiyo oluong’ oganda joka Ragak ni Jo-kakan. Nikech wiye mane okano e dero. Mano e dhoot man ei Alego miluongoni Kakan. Bang’e nochako onyuomo nyar Seje miluongoni Anyango. Mago e dhoudi maloso Kakan-Kanyango ei Alego.

 

Jagoro kendo jarit od Twak; Mikayi Adhiambo Nyar Kochogo
Copyright © 2004 by [Joluo dot Kom]. All rights reserved.
Revised: 12 Aug 2004 00:32:32 +0200 .